Áform um hvalveiðar í sumar - Bréf til atvinnuvegaráðherra
hvalavinir krefjast stöðvunar hvalveiða
Við hjá Hvalavinum, ásamt fleiri umhverfis- og dýravelferðarsamtökum, höfum sent stjórnvöldum bréf í kjölfar yfirlýsinga um fyrirhugaðar veiðar á langreyði. Bréfið má lesa í heild sinni hér: Bréf til Hönnu Katrínar
Við teljum ljóst að áframhaldandi heimildir til hvalveiða vekja alvarlegar spurningar, bæði lagalegar og siðferðilegar. Í bréfinu bendum við á að lagaleg staða Íslands gagnvart alþjóðlegum skuldbindingum sé óljós og að raunveruleg hætta sé á að veiðarnar fari gegn þeim.
Við vísum meðal annars til nýs lögfræðiálits sem dregur í efa gildi fyrirvara Íslands við alþjóðlegt hvalveiðibann. Að okkar mati er óábyrgt að halda veiðum áfram á meðan þessi óvissa er til staðar.
Við bendum einnig á að hvalveiðar hafa ekki verið arðbærar undanfarin ár, á meðan hvalaskoðun hefur byggst upp sem sjálfbær atvinnugrein sem skilar verulegum tekjum til landsins. Lifandi hvalir hafa því skýrt meira gildi fyrir samfélagið en veiddir.
Þá teljum við mjög alvarlegt að ekki liggi skýrt fyrir hvaða stjórnsýslustofnun beri ábyrgð á eftirliti með veiðunum, sérstaklega þegar kemur að dýravelferð. Slík óvissa er ekki ásættanleg.
Við viljum einnig undirstrika mikilvægi hvala fyrir vistkerfi hafsins. Þeir gegna lykilhlutverki í næringarhringrás og kolefnisbindingu og eru því hluti af stærra samhengi loftslagsmála.
Með hliðsjón af þessu förum við fram á:
Að veiðileyfi verði felld úr gildi þar til lagaleg staða hefur verið skýrð
Að frumvarp um bann við hvalveiðum í hagnaðarskyni verði lagt fram án tafar
Að Ísland dragi til baka fyrirvara sinn við alþjóðlegt hvalveiðibann
Við teljum að tímabundin stöðvun veiða sé bæði eðlileg og ábyrg leið á meðan unnið er að skýrari stefnu. Ísland á að vera í fararbroddi í verndun hafsins, ekki dragast aftur úr.
